Արցախի՝ ադրբեջանական վերահսկողության տակ անցած Մեխակավան (Ջաբրայիլ) համայնքում հիմնահատակ ավերվել է տեղի Սբ. Աստվածածին եկեղեցին:
Այս մասին այսօր տեղեկացրել է բրիտանական BBC հեռուստաալիքը, լրագրող Ջոնա Ֆիշերի՝ Արցախի գրավյալ տարածքներ այցելության ժամանակ նկարահանած ռեպորտաժի ընթացքում: Լրագրող Ջոնա Ֆիշերն իր այցելության ընթացքում պարզել է, որ հայկական եկեղեցին, պարզապես, անհետացել է՝ այն հիմնահատակ ավերվել է ադրբեջանական կողմի հրեշավոր նախաձեռնությամբ։
BBC-ի պատրաստած տեսանյութում նշվում է, որ Ադրբեջանը պնդում է, թե էթնիկ հայերը կարող են մնալ Լեռնային Ղարաբաղում, սակայն Հայաստանը Բաքվին մեղադրում է հայկական մշակութային ժառանգության ոչնչացման, ներառյալ՝ եկեղեցիներն ու հուշակոթողներն ավերելու մեջ։
Հիշեցնենք, որ Արցախի Մեխակավան համայնքի Սբ. Աստվածածին եկեղեցին կառուցվել է 2017 թվականին՝ բարերար Գրիգոր Մովսիսյանի միջոցներով: Եկեղեցու օծման հանդիսավոր արարողությունը տեղի է ունեցել Արցախի թեմի այժմյան առաջնորդ՝ Տ. Վրթանես եպիսկոպոս Աբրահամյանի ձեռամբ:
Հեղինակ՝ Նվարդ Մանվելյան
Տեսանյութը` հղմամբ
https://www.bbc.com/news/av/world-europe-56517835?fbclid=IwAR0crrRWmQlJb2unsZe6NjGxaCfd6OHMVg2T8QqT1TYgnpPXqlU2KTwtvOg