Տնօրինությունը կանչել է բժիշկներին և «շան լափ» թափել,  բղավել

AntiFake.am-ին հայտնի դարձավ, որ պատերազմից հետո անհետ կորած զինծառայողներից ոմանք ծանր վիրավորումով և անգիտակից վիճակում տեղափոխվել են տարբեր հիվանդանոցներ, իսկ պաշտպանության նախարարությունը մատը մատին չի տվել այդ զինծառայողներին նույնականացնելու և նրանց հարազատներին գտնելու համար։

Այդ վիճակում գտնվող 5 զինծառայողներ տեղափոխվել են Վ.Ա. Ֆանարջյանի անվան ուռուցքաբանության ազգային կենտրոն։ Զինծառայողներից որոշները այնքան ծանր վիճակում են եղել, որ վիրահատությունից հետո շաբաթներով ուշքի չեն եկել։ Զինվորները փաստաթղթեր չեն ունեցել, և հնարավոր չի եղել նույնականացնել նրանց։ Տեսնելով, որ պատկան մարմինները, մասնավորապես՝ պաշտպանության նախարարությունը որևէ քայլ չեն ձեռնարկում զինծառայողներին նույնականացնելու և նրանց հարազատներին իրենց զավակների ողջ լինելու մասին բարի լուրը հաղորդելու համար` բժիշկներն իրենք են սկսել զբաղվել այդ հարցով՝ փորձելով տարբեր միջոցներով գտնել զինվորների ազգականներին։ Ուռուցքաբանության ինստիտուտի տնօրեն Նարեկ Մանուկյանը, որը նաև Արսեն Թորոսյանի մտերիմն է, ամեն կերպ խոչընդոտել է բժիշկների որոնումները՝ շեշտելով, որ դա ՊՆ-ի գործն է։ Մեր աղբյուրի հաղորդմամբ՝ նա նույնիսկ սպառնացել է բժիշկներից մեկին, որ կհեռացնի աշխատանքից, եթե վերջինս չդադարի զինծառայողների բարեկամների փնտրտուքը։ Նարեկ Մանուկյանին այս հարցում օգնել է նրա առաջին տեղակալը՝ Արամ Ջիլավյանը, որը նույնպես «շան լափ» է թափել այն բժիշկների գլխին, որոնք կարողացել են գտնել անգիտակից զինվորների հարազատներին։ Նշենք, որ այդ ողջ ընթացքում ՊՆ-ն մատնված է եղել անգործության և բացարձակ չի զբաղվել վիրավոր զինվորների տվյալների ինդենտիֆիկացիայի, ծնողների և բարեկամների որոնման աշխատանքներով։

Ֆանարջյան կենտրոնի բժիշկների փոխանցմամբ՝ իրենց ջանքերով հաջողվել է գտնել անգիտակից վիճակում հիվանդանոց տեղափոխված 4 զինծառայողների՝ Հովիկի, Խաչիկի, Օլեգի և ևս մեկ զինծառայողի հարազատներին։ 5-րդ զինծառայողի հարազատներին գտնել այդպես էլ չի հաջողվել, և նա 2 օր անգիտակից մնալուց հետո մահացել է։

Յուրաքանչյուր դեպքում, երբ բժիշկներին հաջողվել է գտնել անգիտակից զինվորների հարազատներին, տնօրինությունը կանչել է բժիշկներին և «շան լափ» թափել,  բղավել է, թե «դա ձեր գործը չէ, մի խառնվեք դրա մեջ»։

Բժիշկները անգիտակից զինծառայողներից մեկի ծնողներին գտնելուց հետո ստիպված զգուշացրել են նրանց, որ վերջիններս հիվանդանոցի տնօրինությանն ասեն, թե իրենք պատահաբար են գտել իրենց որդուն՝ բոլոր հիվանդանոցներում փնտրելուց հետո, որպեսզի զինվորի ծնողներին գտած բժիշկները խուսափեն տնօրինության կողմից իրենց գլխին թափվող հերթական «շան լափից»։

Բժիշկները չունեն այն հարցի պատասխանը, թե ինչու են իրենց արգելվել զբաղվել անգիտակից զինծառայողների հարազատների փնտրտուքով, նաև զարմանում են, թե եթե իրենց արգելում էին օգնել այս հարցում, ինչու ՊՆ-ն անձամբ չէր զբաղվում դրանով. «Ես չեմ կարողանում հասկանալ` ինչն էր խնդիրը։ Գուցե իրենք (պաշտպանության նախարարությունը — խմբ.) չէին հասցնում, միգուցե իսկապես շատ էին վիրավորները, ինչ վատ էր, որ մենք էինք կողքից օգնում։ Ուզում եմ հասկանամ՝ ինչով էինք մենք խանգարում, ոչ ոք չբացատրեց։ Մեզ զայրացնում էր այն, որ մենք չէինք տեսնում, որ որևէ մեկը փորձում է գտնել այդ վիրավոր զինծառայողների հարազատներին։ Մենք դա չէինք տեսնում»,- ասաց մեր զրուցակիցը։

AntiFake.am-ը փորձել է խնդրի շուրջ պարզաբանում ստանալ պաշտպանության նախարարությունից, սակայն մեր զանգերն այդպես էլ անպատասխան են մնացել։

Նկատենք, որ պաշտպանության նախարարությունը մինչ այս պահը թաքցնում է 44-օրյա պատերազմի հետևանքով հայկական կողմի մարդկային կորուստների իրական թիվը՝ դա պետական գաղտինք որակելով։ Հայ հասարակությանը անհայտ են անհետ կորած զինծառայողների, գերիների և պատերազմում վիրավորված զինվորների թիվը։ Արդեն իսկ ակնհայտ է, որ պաշտպանության նախարարությունը ջանք ու եռանդ չի խնայում այդ տվյալները թաքցնելու համար։ Եվ ահա այդ դրվագներին գումարվում է ևս մեկը՝ հիվանդանոցներում գտնվող անհետ կորած զինծառայողների նույնականացմամբ, նրանց հարազատների որոնման աշխատանքներով չզբաղվելը, ինչը կուտակված բազմաթիվ հարցերին ևս մի շարք հարցեր է ավելացնում։

Հիշեցնենք, որ Նարեկ Մանուկյանը նախկինում նույնպես աչքի է ընկել բուժաշխատողի հետ իր աշխատասենյակում ծեծկռտուք «ունենալու» և վերջինիս քիթը ջարդելու գործով, ինչից հետո նա ոչ միայն չազատվեց իր զբաղեցրած պաշտոնից, այլև դարձավ Ուռուցքաբանության Ազգային Ինստիտուտի տնօրեն (մինչ այդ պաշտոնակատար էր) /խմբագրություն/։

Կիսվել գրառումով՝

Թողնել պատասխան

Ձեր էլ-փոստի հասցեն չի հրապարակվելու։